月夜の枫林

原来，ICU＝Intensive Care Unit

諗唔到，我嘅急救术，今日要噉用。諗唔到，我捐血储埋嘅证明，今日要噉用。

曾经，有个人，喺嗰个地方带我来到呢个世界。依家，我将佢送入去嗰个地方。

天见可怜，一定要平安无事。

今日嘅天，晴得有点灰暗。我的晴天，何时才会降临……………………

就如上面嘅图册，一路上记载咗由我进入呢个集团到寻日开业嘅历程。虽然只係短短2个月，但係经历嘅嘢好多，幸好一切尚算顺利，好多好多嘢想讲，但係喺呢一刻，反而唔知应该讲乜。呢一路上有血、有汗、有泪，当嗰晚大屏幕放出嗰段筹建期短片嗰阵，感动嘅何止我一个？历尽千辛万苦、日以继夜噉搏命，为咗嘅，就係令门口嗰块牌可以闪闪发光。一块签到板，一个大蛋糕，足矣。

2011，好一个2011，仅仅2个月零6日，就令我如斯落魄。黎明前总係最黑暗嘅，嗰种腥风血雨嘅感觉真係扑面而来。哼，好，噉就来喇。

今日，突发奇想想话换咗个blog嘅风格，噉先係重新开始嘅迹象嘅嘛。但係可惜，我太钟意呢个风格，都係唔换喇，自己知道重生紧咪得囉。諗諗呢两年时间，我由一个用温暖阳光包裹住灰暗嘅人转变成热血随性嘅人，自己係开心咗，然而身边嘅人呢？唔知我身边嘅所有人，同噉样嘅我相处，会唔会一样开心。

人总係好奇嘅，都想去知道一啲秘密，即使明知道，知道之后自己会唔开心。嗰种心中一声惨叫，继而心碎无痕嘅感觉，一啲都唔好受。但係人就係噉，就好似飞蛾扑火一样。有啲嘢，除咗接受之外，仲可以做乜？恐怕都冇喇。随性、随缘噉做自己。

呢段时间嘅我，好似喺度逃避紧啲乜，但係，其实又唔知究竟逃避紧啲乜，可能，係呢个残酷、虚伪嘅世界吧。

今日，係一个特别嘅日子，亦将会係一个特别嘅日子。

今年係2011年，回想自己嘅人生，原来真係好无奈。细个嘅时候，懵懵懂懂。大个啲，又被形势所逼而随波逐流。因为睇透啲教育制度而唔钟意读书，令成绩不佳学历不高。最后跌跌撞撞而又好顺理成章噉入咗呢个行业，到依家为止11年。11年，话长唔长，但係都经历咗唔少，固然开心嘅事係比较多嘅。回望我喺呢个行业嘅11年历史，原来我係唔开心嘅。每日为咗还债而打呢份工，带住面具返工做嘢，总係有人同你勾心斗角，何必呢。

寻晚，同阿妈出去食饭，行返屋企嘅时候，见到江边有班伯伯喺度夹band。平时我就唔会行埋去睇嘅喇，因为平时嘅我太匆忙，而寻晚，我行咗埋去睇，其实啲伯伯都好犀利嘅。慢慢发现以前嘅自己错过咗好多，好多呢啲咁平常而又美好嘅生活点滴。呢几个月，我諗得好清楚，我要向我自己真正嘅目标进发，我要嘅唔止係生存，而係生活。品味生活，享受生活。